حاجة ترد الروح بالجد.. وانا متحركة من بيتنا بالجزيرة (التي) صباح اليوم ومتجهة الى الخرطوم ام درمان تحديدا لورشة عملية انتابني شعور جميل ومخيف في نفس الوقت رغم انو دي ما اول مرة امشي الخرطوم بعد الحرب، شعور جميل كنت متحمسة للشغل اللي انقطعت عنه لفترة طويلة واللي حلّ محله عواسة الكسرة والذي منه، ومخيف لاني كنت خاتة صورة كلها رهبة وخوف ناتج من مخلفات للحرب النفسية.. اول ما وصلت السوق المركزي تفاجأت بكمية من البشر طيب ياجماعة البرة البلد منو والناس دي كلها جات متين ومن وين.. بقدرة قادر وصلت امدرمان من الزحمة.. ام در الآن تحولت إلى عروس بهية الطلعة في كامل زينتها.. المستشفيات شغالة الأسواق زحمة شديدة المواصلات اختناق مروري عديل المطاعم تختار بس وكل ما تشتهيه الأنفس.. هدوء عجيب رغم الاكتظاظ وأمان يفوق امان ما قبل الحرب.. ومن هذا المنبر ولكوني شاهدة عيان على استتباب الأمن وعودة العافية إلى جسد العاصمة المثلثة انادي أبناء بلدي الحبيب بأن عودوا ادراجكم وعمروا بيوتكم بالحب والأمان..
هادية قاسم