الطلاق في قانون الاحوال الشخصية للمسلمين السودانيين
إعداد /الرشيد آدم
الطلاق ما كلمة عابرة، ولا قرار بيتخذ في لحظة غضب، هو نهاية حكاية بدأت بودّ، واتبنت على مودة ورحمة، واتزرعت فيها أحلام كبيرة وأمل في عمر طويل. الطلاق وجع صامت، بيتسلل بين التفاصيل الصغيرة؛ في بيت كان عامر، وضحكة كانت حاضرة، وكلام كان مليان دفء. الطلاق ما بس فراق بين زوج وزوجة، بل أثر بيمتد للأطفال، وللأسرة، وللمجتمع كلو، وعشان كدا الشرع والقانون ما خلّوه ساي، أحاطوه بضوابط، وسبقوه بمحاولات إصلاح، ونظروا ليهو كآخر الحلول ما أولها.
اتكلمنا في منشور سابق عن آثار الزواج، وبدأنا بـ النفقة ثم الحضانة، كحقوق مترتبة على قيام العلاقة الزوجية.
واليوم، في هذا المنشور رقم (1)، بنفتح ملف الطلاق باعتباره أخطر أثر من آثار الزواج، ونتناولو بالشرح المبسّط وفقاً لأحكام قانون الأحوال الشخصية للمسلمين لسنة 1991م، من المادة (127) إلى المادة (141)، عشان نفهم متين الطلاق بكون واقع، ومتين ما بكون، وشنو ضوابطو الشرعية والقانونية، بعيداً عن التسرّع والكلام المهدد البيوت
1- شنو المقصود بالطلاق في القانون؟
القانون عرّف الطلاق بأنو:
حل عقد الزواج بالصيغة الموضوعة له شرعاً.
يعني ببساطة: الزواج ما بينتهي ساكت، لازم صيغة معتبرة شرعاً وقانوناً.
مثال:
زول قال لزوجتو صراحة: إنتِ طالق هنا الطلاق واقع.
لكن لو قال كلام ما واضح وما قاصد الطلاق بنشوف النية والقرائن.
2- الطرق البقع بيها الطلاق
القانون ذكر طرق واضحة:
1️⃣ باللفظ الصريح
زي: إنتِ طالق، طلقتك.
2️⃣ بالكتابة
لو الزول كتب الطلاق وقاصدو فعلاً.
3️⃣ بالإشارة المفهومة
وده في حالة العجز عن الكلام، زي الأخرس.
مثال عملي:
زول أخرس أشار إشارة مفهومة قدام الشهود وقاصد الطلاق .الطلاق واقع.
3- حالات ما بوقع فيها الطلاق
القانون كان واضح جداً في النقطة دي:
1️⃣ الطلاق المعلّق على فعل شيء أو تركه إلا إذا ثبت قصد الطلاق حقيقة.
2️⃣ الطلاق بالحنث في يمين الطلاق.
3️⃣ الطلاق المقرون بعدد لفظاً أو كتابة أو إشارة لا يقع إلا طلقة واحدة رجعية.
4️⃣ الطلاق الصادر من شخص فاقد التمييز بسبب:
• الجنون
• السكر
• الإكراه الملجئ
مثال:
زول سكران قال كلام طلاق ما بوقع.
زول مكره قال طلاق تحت تهديد ما بوقع.
4- الطلاق المعلّق على شرط (أكتر نوع منتشر في الواقع)
الطلاق المعلّق هو إنو الزوج يربط الطلاق بحصول فعل أو ترك فعل في المستقبل، وده من أكتر الأنواع البتدخل الناس في حيرة واستشارات.
أمثلة شائعة جداً:
1️⃣ لو مشيتي بيت أهلك بدون إذني إنتِ طالق.
2️⃣ عليّ الطلاق لو كلمتي فلانة.
3️⃣ لو اتأخرتي من الشغل بعد الساعة ستة إنتِ طالق.
4️⃣ عليّ الطلاق ما تطلعي الليلة.
5️⃣ لو الزول دا دخل بيتنا تبقي طالق.
6️⃣ عليّ الطلاق بالثلاث لو عملتي كدا.
في الغالب الأمثلة دي ما مقصود بيها إنهاء الزواج، إنما التهديد أو المنع، وعشان كدا القانون اعتبر أغلبها يمين طلاق لا يوقع الطلاق بالحنث، والقاضي بينظر للنية والظروف، ما للفظ براهو.
5- الطلاق المتتابع (أو الطلاق المقترن بالعدد)
الطلاق المتتابع هو إنو الزوج يوقع أكتر من طلقة في مجلس واحد أو بلفظ واحد، زي يقول:
إنتِ طالق طالق طالق او انت طالق بالثلاث
القانون السوداني كان واضح وقال:
الطلاق المتتابع لا يقع إلا طلقة واحدة رجعية، إلا إذا قصد به التأكيد وإلا وقع بعدده.
يعني شنو الكلام دا؟
يعني الأصل إنو القانون ما بعترف بتكرار الطلاق في لحظة غضب واحدة، وبيحسبها طلقة واحدة رجعية.
أمثلة:
– زول قال لزوجتو في خناقة: إنتِ طالق طالق طالق تقع طلقة واحدة رجعية.
– زول قال: إنتِ طالق بالثلاث برضو طلقة واحدة رجعية.
– إلا لو ثبت قدام المحكمة إنو قاصد فعلاً إيقاع الثلاث للتأكيد، وده نادر جداً في الواقع.
الفكرة الأساسية هنا:
القانون سدّ باب التلاعب والانفعال، وما خلى كلمة في غضب تهد بيت كامل.
6- ممن يقع الطلاق؟
القانون نص صراحة على إنو:
يقع الطلاق من الزوج، أو من وكيله، أو من الزوجة إن كانت تملك أمر نفسها.
يعني الطلاق ما أي زول يوقعو.
أمثلة على ذلك
1️⃣ الزوج نفسه
وده الأصل. الزوج يوقع الطلاق متى توفرت الشروط.
مثال:
الزوج قال الطلاق بنفسه الطلاق صحيح.
2️⃣ وكيل الزوج
لو الزوج وكّل زول توكيل صحيح بالطلاق.
مثال:
زول مسافر قال لأخوه: وكّلتك تطلّق زوجتي لو طلّقها، الطلاق واقع.
3️⃣ الزوجة إذا ملكها الزوج أمر نفسها
يعني الزوج قال ليها: أمرك بيدك.
مثال:
الزوج قال لزوجتو: أمرك بيدك، وهي قالت: أنا طلّقت نفسي الطلاق واقع.
لكن بدون تمليك صريح الزوجة ما عندها حق تطلق نفسها.
7- وقت وقوع الطلاق
القانون قال:
يُسند الطلاق إلى وقت وقوعه، فإن تعذر إثبات ذلك، أُسند إلى وقت ثبوت الافتراق، وإلا فمن تاريخ الإقرار به أمام المحكمة.
الكلام دا مهم جداً عملياً.
نفهمو بالأمثلة:
1️⃣ لو الزوج قال:
أنا طلّقتها يوم الجمعة الفات
وعندو بينة الطلاق يُحسب من يوم الجمعة.
2️⃣ لو قال:
طلّقتها قبل شهر
لكن ما عندو دليل
القاضي يرجّع الطلاق لأقرب وقت ثابت، زي وقت خروجها من البيت أو رفع الدعوى.
3️⃣ لو ما في أي دليل ولا افتراق ثابت
الطلاق يُحسب من تاريخ الإقرار قدّام المحكمة.
ودي نقطة ناس كتار بجهلوها وبتفرق في:
– العدة
– الرجعة
– النفقة
– الزواج الجديد
8- أهلية المطلق
لازم الزول يكون:
• عاقل
• بالغ
• مختار
أي خلل في الحاجات دي الطلاق ما صحيح.
9- شرط وقوع الطلاق على الزوجة
القانون قال:
لا يقع الطلاق إلا على زوجة في زواج صحيح قائم حقيقةً أو حكماً.
مثال:
لو الزواج فاسد أو باطل من الأساس الطلاق ما عندو محل.
10 – أنواع الطلاق
القانون قسّم الطلاق لنوعين كبار:
1️⃣ الطلاق الرجعي
• ما بنهي عقد الزواج فوراً.
• الزوج عندو حق يراجع زوجتو أثناء العدة بدون عقد جديد.
مثال:
طلقها طلقة أولى، ولسه في العدة، قال: راجعتك رجعت زوجتو.
2️⃣ الطلاق البائن
وده نوعين:
(أ) بائن بينونة صغرى
• ما بترجع إلا بعقد ومهر جديدين.
مثال:
خلع، أو طلاق قبل الدخول.
(ب) بائن بينونة كبرى
• ما بترجع إلا بعد:
• تتزوج زول تاني
• ويدخل بيها دخول حقيقي
• وبعدين يفارقها
11- متين يكون الطلاق رجعي؟
الأصل إنو كل طلاق رجعي،
إلا في الحالات دي:
• الطلاق المكمل للثلاث
• الطلاق قبل الدخول
• الخلع
• الطلاق على بدل
• أي حالة نص القانون إنها بائنة
12 – المتعة
المطلقة بتستحق:
• نفقة العدة
• ومتعة حسب يسار الزوج
• لكن ما تتجاوز نفقة ستة أشهر
حالات ما فيها متعة:
1️⃣ التطليق لعدم الإنفاق بسبب إعسار الزوج
2️⃣ التفريق للعيب إذا كان من الزوجة
3️⃣ الخلع أو الفدية أو التفريق على مال
13- الرجعة
• الرجعة حق للزوج في الطلاق الرجعي
• ما محتاجة رضا الزوجة
• وما بسقط إلا لو الزوج تنازل عنه صراحة
كيف بتقع الرجعة؟
• بالفعل
• بالقول
• بالكتابة
• بالإشارة المفهومة عند العجز
شرط صحة الرجعة:
• إعلام الزوجة بها أثناء العدة
في ختام المنشور
الطلاق في القانون السوداني:
• ما فوضى
• مضبوط بضوابط شرعية وقانونية
• بحفظ حق الزوجة والزوج
• وبيمنع التلاعب بالألفاظ والانفعالات
⸻
تجوال نيوز
نسعد بتواصلكم معنا
يوجد بطرفنا محاميين للاستشارات القانونية
يمكنك مراسلتنا على واتساب
٠١٢٤١٨٨٨١٨
السادة القانونيين
نتيح لك الفرصة للنشر عبر الموقع
ارسل صورة
المادة